සමාව යදින දෑසින් මාදෙස බලලා
සුළු දිය පහකරයි ඇද ඇතිරිලි තෙමලා
පුතු කැව් කෑම ඇගෙ කටපල්ලේ වැටිලා
ගෙදර බුදුන් දුබලව ඇත ඇදටවෙලා
කැතකුණු අතගගා මා හැදු වැඩු අම්මේ
ගත ලේ කිරට හරවා මට පෙව් අම්මේ
මා වෙනුවෙන්ම ඔබෙ දිවි කැපකල අම්මේ
ඔබ නොසිටින්න මා අද කොතනද අම්මේ
බිත්තිය අතගගා එළියට යන්න එපා
මළ පහවෙයි කියා කුසගිනි දරනු එපා
මා නිදියැයි සිතා නිහඩව සිටිනු එපා
ඔබ උවටැනින් මා නොවැටෙයි සතර අපා
මගෙ දරුවනේ නොකරව් ගේ දොර සද්ද
නහවා කවා පොවමින් කළමැන සුද්ද
කොපමන වාරයක් ඔබ නහවන්නට ඇද්ද
මෙලොවේ මීටවැඩි මැණිකක් පවතිද්ද
බුදුබණ අසාගන්නට ඉඩ සලසන්න
උණුපැන් සිසිල්පැන් ඈ හට සපයන්න
දැනුනත් ඕනීකම බැහැ දැන් පවසන්න
කළපින් මෙනෙහිකර ගන්නට ඉඩදෙන්න
